من جبل لبنان انطلقت أولى مراحل الانتخابات البلدية والاختيارية، وسط استنفار أمني وتنظيم دقيق.
كتار كانوا مراهنين على عدم تمكّن العهد الجديد والحكومة الجديدة من تنفيذ هالانتخابات بوقتها وعالمستوى المطلوب، بس بـ4 أيار في كتير معادلات تغيّرت واللبنانيين يلي انتخبوا ويلي ما كان دورن ينتخبوا بجبل لبنان نطروا لساعات متأخرة شو الصورة الجديدة اللي انبنت بجبل لبنان ويلي رح تأثر عالصورة السياسية بالانتخابات النيابية ب2026.
الحماس لفّ مناطق جبل لبنان. اشتعلت المعارك الانتخابية بالمتن، جبيل، جونية وقرى وبلدات مختلفة… تحالفات لافتة بين القوات اللبنانية والكتائب، والنائب نعمة افرام وفريد الخازن ومنصور البون بوجه “التيار الوطني الحر”، أوصلت لوائح كاملة لأهم وأكبر بلديات جبل لبنان خصوصا ولبنان عموما، ببروفا انتخابية عالارجح رح تمتد للانتخابات النيابية المقبلة.
رئيس حزب “القوات اللبنانية” سمير جعجع، بارك للمناصرين، واعتبر أن “لبنان نفض عنه الجلد القديم”.
هالتغيير الكاسح والمفاجئ بجبل لبنان فاجأ تسونامي التيار السابق. فمعركة جونيه بـ2016 سميّت ب”معركــة رئاســة الجمهوريــة” وكانت وما زالت معركـة اساسية بالنسبة للطائفـة المارونيـة. وتمكّن التيار العوني بوقتها بالفوز بأكترية المقاعد بانتخابات جونيه بوج الكل.
الوم بـ2025 0 مقعد للتيار بجونيه. هلّق البعض استند على نظرية اتجمعوا بوج التيار وين شطارتن أكيد رح يكسحوا المناطق، بس هالبعض تناسوا انو التيار نفسو عمل تسونامي بـ2005 وكرر فوزو بالـ2016 لما كان وحيد بوج الكل.
معاقل أساسية متل الجديدة البوشرية السد، جونيه، وجبيل خرجت نهائيا من ايد التيار العوني اليوم، وهيدا مؤشر مهمّ على تبدل كبير بالمزاج المسيحي، فيلي قام بالتسونامي بعام 2005 بوجه الكل خسر اليوم كل مقاعدو.
